Rabbi Yessirle Süvar Ol

A-Z Dizin search Giriş Yap Kayıt Ol Ana Sayfa visibility “Rabbi yessir”le süvâr ol esb-i himmetle revân “Rabbi temmim” niyyetiyle hatm ola emr-i ‘udvân Zikr-i tevhîd emsilesin nahv ile dilde oku Hâl ile et sa’y ü gayret mâzî müstakbeli ko Nasr-ı nusret fâ’ilin bil sîga-ı mansûra gel Emr u nehy ile vücûdun ola meczûm-ı ezel Ola ma’sûm-ı cevârih darb-ı Hakk’la terbiyet Ders-i Hakk’la hâce-i dilde ideler kurbiyet Ceyş-i a’dâ bu salâh-ı hâl ile bulsa kemâl Şehr-i dilde olmaya aslâ fesâd ü ihtilâl Çün bu üslûb üzre islâm ‘askeri kuvvet bula Ol ‘adüvv-i nefs ü şeytân leşkeri mağlûb ola Hısn-ı tevhîde dayanup burc-ı dilde kâim ol Kuvvet-i kudsî-i ilâhî sende olsun hâfız ol Sarfa başla nakd-i ‘ömrün nahv-i vârın mahv ile Mübtedâ-yı Hakk’dan eyle tâ haber dola dile Kendini Hakk’a muzâf it ma’rifet bulsun gönül Bilesin tâ Hakk’ı sen de açıla dildeki yol Eyle eczâ-yı vücûdun terkîbinden bir kelâm İtme sarf nefsini gayra nisbetin ola çü tâm Nasb-ı ref’in sâhibin bil ola kim merfû’ ola Mâlik ola tahtgâha hükmüyle mansûb ola Muzmırın Hakk olsa zâhirden gönül müstağnîdir Neylesin ma’mûlü âhir cümle-i dil muğnîdir Hakk’la olsa temyîzin ‘atf-ı ağyâr istemez
Zât ile mevsûf olan dil gayra itbâ’ istemez
Mantık-ı Hakk’dır çü gönlün oku andan bir kıyâs Şekl oldur vücudûn fikr kıl ey Hakk-şinâs “Men arefe nefseh” matlûbuna mevzû’ ola “Kad arefe Rabbeh” mahmûl-i maksûdun ola Çeşm-i sûret ‘âlem-i sugrâsına eyle güzer Gönlüne gel nüsha-i kübrâ-durur eyle nazar Kıl basîret nergisiyle mevsıl-i matlûb ola Çün netîcen ola Hakk’ı ma’rifet hâsıl ola Ger me’ânî ister isen kâinâta hoşça bak Bu kadar elfâz u eşhâs her birinden al sebak Bunca eşyâ sandığın olmuş kitâb-ı Hakk şehâ Kıl nazar ibretle ma’nâsın oku ne dir sana Hâl diliyle cümlesi dir teslîm-i fermândeyiz Hep senin’çün halk olunduk derdine dermândeyiz Sana burhân bes-durur bunca zevâhir dikkat it Her birinde nice ma’nâ var-durur anı fikr it Gâfil olma bir cöp olsa dahi andan ‘ibret al Bir karınca olsa tahkîr itme sakın hisse al Var-durur tahtında anın nice ma’nâ-yı latîf Ger bilirsen bu me’ânîlerde sen oldun ‘arîf Mâsivâdan gönlünü fasl eyle şâhım vasla gel Hakk ile birlikde vasl eyle özünü Hakk’a gel İhtisâr eyle umûr-ı nefsini ıtnâbı ko Nice ma’nâ dilde fehm it mu’cizi Hakk’dan oku Bu cihân kârını anla istiârât u mecâz Kâr-ı bâkîyle kinâye ile öğren gizli râz Teşbîh ile nefsini gel özge şeyden hisse al Vech-i şebeh ola Hakk’la gayrı etme kıyl ü kâl Her ne sûret işler isen kıl hakîkatle ‘amel Tâ gönülde olmasın bâzâr-ı Hakk ile cedel Tâlib isen ilm-i bedî’ okugil gönlünde sen Dil cihânında neler var birbirinden hoş hasen Eyle tecrîd hâr u hâşâkden gönül bostânını Neşr ola güller
çü anda dil bula ‘unvânını Her tarafdan
çok bedâyi’ler gönülde keşf ola Lafz u ma’nâ hep müzeyyen oluben sûret bula Gel beri ‘ilm-i usûlden okur isen diyelim Her birinin çün usûlün niredir okuyalım Girüben dershâne-i dilde usûl-i dîn oku Mâsivâyı terk edüp cümlesini dışarda ko Dîn usûlü sırr-ı tevhîddir oku esrârını Her işârât u delâlât andadır fehm it anı Bir kitâb-ı Hakk-durur kim anda mestûrdur kamu Her varakda nice bin türlü ‘ulûm olmuş dolu Çâr ebvâb üzre oldu ol kitâbın zübdesi Bir şerî’at bir tarîkat bir hakîkat cümlesi Dördüncü ma’rifetdir hâtime bulur çü bâb Bunda dahi var-durur bir gâyete fasl-ı hitâb Gâyeti fasl-ı hitâbın hem usûlü Hakk-durur Cümle maksûd merci’idir andan özge yok-durur ‘Âlem-i dilde bulunur tahsîli hem andadır
Hikmet ü hey’et semâ-ı dilde çün seyrândadır
Encüm ü şems ü kamer hep burc-ı dilde devr ider ‘Ârif olan çün gönül göğünde anı seyr ider ‘İbret ile kıl nazar bu kâinâta özge bak Her bir eşyâ bir kitâb-ı Hakk-durur algıl sebak Bu kadar eşcâr u evrâk her biri tefsîr ider Sırr-ı vahdetden ‘acâib remz ile tahrîr ider Bu göz ile göremezsin gel basîret gözün aç Cân kulağın ver duyasın bulasın anda revâc Her ‘ulûmdan okudum bir nebze sana ey oğul Tâlib isen var-durur senden bulara gizli yol Ger bilirsen nefsini bildin Hakk’ı gizli ‘ayân Kâmil-i insân olursun kalmaya zann u gümân Çünkü kâmil oldun ise kâinâtın sırrını Hep vücûdunda bulursun cüz’î küllî vârını Levh-i dilde resm olunmuş cümlesi mestûrdur Hakk’ı dahi sende buldun sanki sen Mansûr’dur Zâhir ü bâtın bir olur tefrîka kalmaz
şehâ Cem’-i cem’i-l-cem’ olur fark-ı cem’ bulmaz nemâ Sûzî miskînin murâdı bir du’âdır hayr ile Okuyanlar dü cihânda yâd ola çün hayr ile