Ey dil koyuban yârını ağyâra yapışma Gül terkin urup bilmeyüben hâra yapışma Şem’a dönüben şevk ile yan dilbere karşu Ey dil görüben nûr-ı revân nâra yapışma Terk eyle fenâ bârını ger bâkî dilersen
Gönül virüben alma fenâ dâra yapışma Mansûr oluben ‘aşk ile bil dârını nedir Dârın o iken mihr ile bu dâra yapışma Çün cîfe didi dünyâya Hakk sevdiği mahbûb Tâlib oluban seg kimi murdâra yapışma İnci kimi tak kulağına öğüdüm işit Bu dürri koyup incili gûşvâra yapışma Bil kıymet-i dürr-i bahr-i ledünn dürrini sâfî Anı koyuban lü’lü’-i şehvâra yapışma ‘Aşk ile didin çünki belî dönme belâdan İkrârını terk eyleyüp inkâra yapışma Ağ ile kara terkin uran ebcedin okur ‘Aşkın işidüp mecma’-i muhtâra yapışma Alup satılan halk-ı cihân nakd-ı dağladır
Ol bey’ ü şirâ kılmağa bâzâra yapışma Tecrîd ile bul rûh-ı kuds zindesin ey dil Her ferd ile tersâ kimi zünnâra yapışma Kesb eyle bugün âhiretin danlaya koyup Şugl ü ‘amel-i dünye-i gaddâra yapışma Şeytan kimi yolunu uran nefs-i hevâdır Aldar seni çü mekr ile mekkâra yapışma ‘Aşk ile yola girübeni şer’-i sırât it Âsân deyüben ‘akl ile düşvâra yapışma Terk eyle direm Gülşenî’ye ‘aşk ile ‘ârın Bednâm oluban ‘âkıl u bî-‘âra yapışma
Bu eser Yapışma ismiyle
İlahi kategorisine eklenmiştir.
