Nuri Basarım

Nûr-i basarım serdeki sevdâ-yı Muhammed Sevdâ-yı serim dîde-i şehlâ-yı Muhammed Ârâm-ı dilim sünbül-i ra’nâ-yı Muhammed Sînemdedir ol dâğ-ı temennâ-yı Muhammed Gönlümdedir ol nâr-ı tevellâ-yı Muhammed

Hiç kalmadı başda heves-i lâle-i ahmer Etmez dil-i şeydâ taleb-i sâgar-ı Kevser Her dem ezvâkımı hakkıyla mu’attar Her lahza kılar gönlümü reş-kâver-i ‘anber Efkâr-ı dü gîsû-yi semensâ-yı Muhammed

Bir şahsın olursa ger ihlâs refîki Tevfîk olur elbette onun yâr-ı şefîki Mişkât-ı hidâyetle bulur feyz-i tarîki Eltâf-ı Hudâ’dır verir îmân-ı hakîkî Dildâdelere zülf-i çelîpâ-yı Muhammed

Ey tûtî-i hoş-gû-yi kalem dalma sükûta İzhâr ediyor ol Hakk’ı varmış ki sübûta Mi’râcı verüp şa’şa’a taht-ı ceberûta İsrâda salup velvele mülk-i melekûta Reftâr-ı şîrin-kâmet-i bâlâ-yı Muhammed

Teşrîf-i kudûmüyle melek hurrem u handân Envâr-ı fuyûzuyla felek cennet-i ‘adnân Yâ Rab bu ne devlet bu ne ‘izzet bu ne ihsân Eyyâm u leyâlî heme sergeşte vü hayrân Reşk-zede-i Leyle-i İsrâ-yı Muhammed

Halâsım edince Hakk içün hâlî halelden Âyînemi saf etdi Hudâ jeng-i emelden Endîşe yok artık ne emelden ne ecelden El-minnetü lillâh ki menem rûz-ı ezelden Pervâne-i esmâ-yı müsemmâ-yı Muhammed

İhsân edeli feyzini ol pîr-i mufahham Oldum şu kesâfetlebir ihlâs-ı mücesssem Es’ad sana mevdû’-i vesâyâ-yı mükerrem Ey Mîr-i Nigârî bana mahsûs u müsellem Ser-hizmet-i meyhâne-i sevdâ-yı Muhammed