Hevâ-yı mâsivâyı ey dil-i dîvâne teb’îd et Hakîkat matlabında müstakîm ol Hakk’ı tefrîd et Cihânın gülşeninde ihtiyâr-ı bezm-i tecrîd et Yakıp ‘aşk oduna cânı meşâmın bû‐yi tevhîd et Kamûya yek nazar-birle şuhûdun rû‐yi tevhîd et
Şu’ûr oldukça başında gönül gafletle davranma Cenâb-ı Hakk’a teslîm ol sakın şeytâna aldanma Fenâ bahrinde cevlân et seyâhat eyle saklanma Şu mâhîler gibi kendini deryâdan cüdâ sanma İhâta eylemiş her yana bak sû‐yi tevhîd et
Beş on gün ‘ömr-i dünyâ değmez ey dil fikr ü tedkîka Semend-i himmeti sevk eyle cevlângâh-ı tevfîka Zuhûrât-ı bedâyi’le işin hasr eyle tatbîka Salınma câh‐ı taklîde su’ûd et ‘arş‐ı tahkîka Sana senden sefer eyle seni sen dû‐yi tevhîd et
Na’îm-i ravza-yı rengîn şemîm-i lâle vü nesrîn Cemâl-i nâzik-endâm u visâli-i Leylî ü Şîrîn Yüzünde bû-yi safvet yok kamu eyler seni gamgîn İzâfâtı bırak gözden açılsın dîde‐i Hakk‐bîn Temâşâ‐yı cemâl‐i şâhid‐i dil‐cû‐yi tevhîd et
Derûn-i sîneden gâfil cihât-ı sitteden âgâh Ulaşmaz ka’be-i âmâle hayretde kalır gümrâh Var ise dîde-i dil Es’adâ gör her teferrüc-gâh Salât‐ı ehl‐i kurbun kıblesidir “semme vechullâh” Niyâzî durma dâim secde‐i ebrû‐yi tevhîd et
Bu eser Hevayı Masivayı ismiyle
İlahi kategorisine eklenmiştir.
