Vaslın Reva Kıl

Vaslın revâ kıl ey Hudâ ol küntü kenzullâh içün Cân yoluna olsun fedâ şol ‘ayn-ı zâtullâh içün Evvel kamudan adını önden kodun bünyâdını ‘İzzetine ‘izzet edüp sevdin Habîbullâh içün Senden ‘atâ bizden hatâ böyle kuruldu ibtidâ ‘Afv et bizim hatâmızı Âdem Safiyyullâh içün ‘İsyân denizinden bizi kurtar anın hurmetine Evvel ana kıldın necât Nûh Neciyyullâh içün Deryâyı varlıkdan halâs eyle anın ‘aşkına kim Batn-ı balıkda zikreden Yûnus Resûlullâh içün Hızr içdiği âb-ı hayât ‘âşıklara hâcet değil Vaslın meyinden sun bize Hızr-ı Nebiyyullâh içün Firkat nârıyla cânların göyündürme ey Pâdişâh Göster zâtın gülzârını dostun Halîlullâh içün Hüsn-i cemâlinden cüdâ olanlardan kılma bizi Salma ebed hüzn etmeğe Ya’kûb Hüznullâh içün Hüsn-i cihânın kimseye kalmaz bekâ belli beyân Hüsn-i bekâdan kıl nasîb Yûsuf Hüsnullâh içün Tecellî zâtın pertevi varlık dağın kılsın fenâ Aç “len terânî” perdesin
Mûsâ Kelîmullâh içün Gerçi mücerred pâk idi kaldı semâ-yı sânîde Cümle hicâbı sen geçir ‘Îsâ-yı Rûhullâh içün Hurmetine hurm et bizi kurbetine kurb et bize Künh-i zâta mahrem olan Ahmed Resûlullâh içün İşler Sinân Ümmî hatâ niçün hatâya yüz tuta Gelsin deyü Hakk’dan ‘atâ ol feyz-i fazlullâh içün Ümmi Sinan