Hudâ gönderdi Konya şehrine bir zât bu ezmânda Nazîri gelmemiş sıdk u salâh u ‘ışk u ‘irfanda
Bize mâh-ı siyamda oldı bir gice işaret kim Anın ‘Âşık ‘Alî Pâşâ yazıldı ismi dîvânda
Kubâb altında var nice velîsi gizlü Hallâkın Mukayyed zann olınur bu dahi dîvân-ı Yezdânda
Zarar virmez aña etbâ’ u ensâr kesreti zîrâ Gürûh-ı ‘ârifân çokdur vezîr ü mîr ü hakanda
Muhabbet eyledim ez-cân u dil hâlin işitmekle Velîlerde olur ancak olan hulk-ı hasen anda
Benim kârım (budur) hergiz vezirler medhi nazm-ıla Olur imiş mu’azzeb fâsıkın meddahı nîrânda
Umarız biz du’â vü himmetin ol ‘âşık-ı Hakkın Bulınur kenz-i lâ-yuhsâ birader çünki vîrânda
Ki ‘ışkda ‘ayn u şın kaf var dahi ‘aşkarda var anlar Anın içün dinür ‘aşkar zeban-ı nev’-i inşânda
Mükâşifler dimişler kim gelür bir er ‘Alî adlu Şebîh olmaz aña bir kimse ‘avn-i dîn-i sultânda
Sever sâlihleri talihleri sevmez olur mubgız Muhakkak bil ki bu ahlâk olısar hizb-i merdânda
Bize bağışlasun Hak ol ‘azîzi eyleyüb ibkâ Gerekdür öyle bir zâtın bulunması bu ahyânda
Bu Kuddûsî fakîr dir ol ‘Alî bu olması me’mûl Yazıldı zann olınur çünki ismi levh-i Rahmanda Ahmed Kuddusi
Bu eser Huda Gönderdi Konya Şehrine Bir Zat ismiyle
İlahi kategorisine eklenmiştir.
