Ey Rahmeti Bol Padişah

Ey rahmeti bol pâdişâh cürmim ile geldim sana Ben işledim hadsiz günâh cürmim ile geldim sana

Hadden tecâvüz eyledim deryâ-yı zenbi boyladım Ma’lûm sana ki neyledim cürmim ile geldim sana

Senden utanmayub hemân itdim hatâ gizlü ‘ayân Urma yüzime el-emân cürmim ile geldim sana

Aslım çü bir katre menî halk eyledin andan beni Aslım denî fer’im denî cürmim ile geldim sana

Gerçi kesel fısk u fücûr ‘ayb u zelel çok her kusûr Lâkin senin adın Gafur cürmim ile geldim sana

Zenbim ile toldı cihân sana ‘ayân zâhir nihân Ey lutfı bî-had Müste’ân cürmim ile geldim sana

Adın senin Gaffâr iken ‘ayb örtüci Settâr iken Kime gidem sen var iken cürmim ile geldim sana

Hîç sana kulluk itmedim râh-ı rızâya gitmedim Hem buyruğını tutmadım cürmim ile geldim sana

Bin kerre bin ey pâdişâh itsem dahi böyle günâh Lâ-taknatû yeter penâh cürmim ile geldim sana

‘İsyânda Kuddûsî şedîd kullukda bir battâl pelîd Dir kesmeyüb senden ümîd cürmim ile geldim sana Ahmed Kuddusi